مي عمر: مبحبش محمد يجيبلي حاجات غالية.. بحب أجيبها لنفسي
علقت الفنانة مي عمر على حبها لشراء ملابس غالية قائلة: “بحب أجيب ملابس براند كتير ومحمد بيحب يشتريلي وأنا اللي بمنعه وبلاش أفورة، المفروض الراجل الطبيعي يكون جنب مراته طول الوقت، ورغم ده مبحبش إنه يجيبلي حاجات كبيرة وغالية، ومن وأنا صغيرة بحب إني أجيب الحاجات الغالية لنفسي، ومش حاطة الحسد في دماغي رغم إني عارفه إنه موجود في القرآن لكن مبحبش أرمي كل حاجة على الحسد واحنا اللي عاملين حاجة غلط، وبرة الناس بتعمل حاجات وبتنزل على السوشيال ميديا ومبتتحسدش اشمعنى يعني”.
وقالت مي عمر، خلال استضافتها ببرنامج “أسرار” مع الإعلامية أميرة بدر المذاع على قناة النهار: “بحب نيللي كريم اوي وكاملة أبو ذكري خطيرة وأعمالها مميزة وتدخل القلب جدًا ومحمد لو اتحط في مقارنة مع أي مخرج أكيد هختاره، حاجتين مبمسكش نفسي قدامهم التين الشوكي والقصب، وممكن بطني توجعني من كتر أكلهم”.
وأضافت “دوري في نعمة تخنت عشانه لأنها ست طبيعية وبتشتغل وبتحب الأكل وتخنت حوالي ٧ كيلو، وكنت مبسوطة بده، والمسلسل اتصور في أماكن حقيقية مش ديكور حتى المقابر، وأنا عندي فوبيا من الأماكن الضيقة والضلمة، فا قالوا هنعمل تيست وهتنزلي، فأول ما نزلت خفت جدًا وخبطت جامد ومحمد عرض عليا ينزل معايا بس انا خفت جدًا ساعتها”.
برنامج “أسرار” تقدمه الإعلامية أميرة بدر على شاشة النهار يومياً خلال شهر رمضان، في تمام الساعة التاسعة والنصف مساءً، تستضيف من خلاله عدد من نجوم الفن والرياضة والسياسة في مصر.
